In Troosbosbaai by haar Ouma Saar wil Pascale haar stukkende lewe regmaak, haar wonde lek terwyl sy deur haar egskeiding gaan. Juis daarom is dit so vreemd dat God hierdie tyd kies om die Ierse biker, Callum Moriarty, oor haar pad te stuur.
Cynthia Robertson is in Tanzanië gebore en het as kind in verskeie lande grootgeword. Sy het vroeg die wonder van boeke ontdek, en wou skryf. Sy het vier jaar gelede weer haar eerste liefde raakgeloop, en woon die afgelope paar jaar saam met hom in Ierland. Sy verlang haar dood na haar kinders, Suid-Afrika en sonskyn, maar gebruik humor en haar skryfwerk om die lewe ligter te maak.
